Global News & Hot News

ហេតុអ្វីបានជាអូស្ត្រាលីបញ្ជូនជនភៀសខ្លួនមកកម្ពុជា?

ដោយ Saophalniseiy

ថ្ងៃនេះគេហទំព័រព័ត៌មាន ថ្មីៗ សូមលើកយកនូវចំណុចសំខាន់ដែលគួរយល់ដឹង និងទុកជាគំនិតពិចារណា៖

‌១. តើជនភៀសខ្លួនទាំងនោះជាអ្នកណា?
ជនភៀសខ្លួនជាធម្មតាជាជនដែលងាយរងគ្រោះ ដែលពួកគេព្យាយាមរត់គេចចេញពីគ្រោះមហន្តរាយ សង្គ្រាមស៊ីវិល ការសម្លាប់រង្គាល បញ្ហាអស្ថិរភាព និងអសន្តិសុខផ្សេងទៀត។ តាមពិតទៅពួកគេត្រូវបានការពារដោយច្បាប់ ជាពិសេសអនុសញ្ញាស្តីពីសិទ្ធិជនភៀសខ្លួនអនុម័តឆ្នាំ១៩៥១ និងពិធីសារស្តីពីឋានៈជនភៀសខ្លួនឆ្នាំ១៩៦៧ ។ ទាក់ទិននឹងជនភៀសខ្លួនអូស្ត្រាលី របាយការណ៍ជាច្រើនបានបង្ហាញថាជនភៀសខ្លួនដែលកំពុងស្វះស្វែងរកសិទ្ធិ ជ្រកកោននៅអូស្ត្រាលីនោះ ភាគច្រើនជាជនជាតិអ៊ីរ៉ាក់ អ៊ីរ៉ង់ អាហ្វហ្កានីស្ថាន និងស្រីលង្ការ ហើយពួកគេស្វែងរកសិទ្ធិជ្រកកោនដើម្បីកសាងជីវភាព និងគេចពីគ្រោះថ្នាក់។ ប្រជាជនកម្ពុជាមួយចំនួនបានចាត់ទុកបណ្តាក្រុមជនភៀសខ្លូនទាំងនោះជា កាកសំណល់ដែលអូស្ត្រាលីមិនទទួលយក តែប្រជាជនខ្មែរគួរពិចារណាអោយបានស៊ីជម្រៅជាងនេះ ដ្បិតមានហេតុផលមួយចំនួនដែលជំរុញអោយអូស្ត្រាលីត្រូវបញ្ជូន ជនភៀសខ្លួនទៅប្រទេសទីបីទៀត។ ជនភៀសខ្លួនទាំងនោះមិនមែនជាកាកសំណល់ ឬមនុស្សមិនល្អឡើយ តែពួកគេរត់គេចចេញពីគ្រោះថ្នាក់និងភាពភ័យខ្លាច សង្គ្រាមស៊ីវិល ការធ្វើទុកបុកម្នេញ ហើយពួកគេប្រាថ្នាចង់បានជីវិតរស់នៅប្រកបដោយសេចក្តីសុខ និងសុភមង្គលដូចប្រជាជនទូទៅដែរ។

២.ហេតុអ្វីចាំបាច់ត្រូវទទួលយកជនភៀសខ្លួនអោយតាំងទីលំនៅ?
ការទទួលយកការសុំជ្រកកោនរបស់ជនភៀសខ្លួនជាកាតព្វកិច្ចផ្នែកមនុស្សធម៌ ហើយកាតព្វកិច្ចនេះក៏មានចែងកំណត់ក្នុងអនុសញ្ញាស្តីពីជនភៀសខ្លួន ឆ្នាំ ១៩៥១ថែមទៀតផង។ ក្រៅពីនេះ ការទទួលយកជនភៀសខ្លួននេះវាក៏ទាក់ទងទៅនឹងបញ្ហានយោបាយ ដោយប្រទេសទាំងនោះ យល់ឃើញពីការទទួលបានផលប្រយោជន៍សេដ្ឋកិច្ច ការលើកកម្ពស់កិត្តិយសប្រទេសជាតិលើឆាកអន្តរជាតិ ដែលបានចូលរួមក្នុងសកម្មភាពមនុស្សធម៌។ តាមពិត ស្ថាប័នឧត្តមស្នងការជាន់ខ្ពស់ទទួលបន្ទុកជនភៀសខ្លួននៃ អង្គការសហប្រជាជាតិ បានរៀបចំនូវកម្មវិធីមួយអនុញ្ញាតអោយជនភៀសខ្លួនតាំងទីលំនៅ នៅក្នុងប្រទេសដែលស្ម័គ្រចិត្តទទួលយកជនភៀសខ្លួនទាំងនោះ។ ចំនួនប្រទេសដែលចូលរួមនៅក្នុងកម្មវិធីនេះ មានការកើនឡើងជាលំដាប់ដែលក្នុងនៅមានទាំងនៅអាមេរិកខាងជើង អាមេរិកខាងត្បូង អាស៊ី អាហ្វ្រិក និងអឺរ៉ុប ហើយក្នុងនោះក៏មានប្រទេសកំពុងអភិវឌ្ឍន៍ផងដែរ។

៣.ចុះហេតុអ្វីបានជារដ្ឋាភិបាលអូស្ត្រាលីមិនបន្តទទួលយកជនភៀសខ្លួនអោយរស់នៅក្នុងទឹកដីខ្លួន?

មានហេតុផលមួយចំនួនដែលជំរុញអោយអូស្ត្រាលីចាំបាច់ ត្រូវបញ្ជូនជនភៀសខ្លួនទៅកាន់ប្រទេសទីបី៖

-គោលនយោបាយរបស់គណបក្សលោកនាយករដ្ឋមន្ត្រី Tony Abbott ៖
តាមពិតទៅ ក្រោយពីឈ្នះឆ្នោតនៅឆ្នាំ២០១៣ លោក Tony Abbott បានឡើងកាន់តំណែងជំនួសលោកនាយករដ្ឋមន្ត្រី Keven Rudd ដែលមកពីគណបក្សការងារ ហើយរដ្ឋាភិបាលថ្មីដឹកនាំរដ្ឋាភិបាលចម្រុះបានចាប់ផ្តើមរឹតបន្តឹង ការផ្តល់សិទ្ធិជ្រកកោនដល់ជនភៀសខ្លួន ដ្បិតបញ្ហានេះជាបញ្ហាក្តៅផ្នែកនយោបាយក្នុងស្រុក។ លោក Abbott បានប្រើប្រាស់យោធាអោយរឹតបន្តឹង និងគ្រប់គ្រងលើការសុំសិទ្ធិជ្រកកោនរបស់ជនភៀសខ្លូនទាំងនោះ ហើយរាល់ទូករបស់ជនភៀសខ្លួនដែលសំចតនៅអូស្ត្រាលី នឹងត្រូវគេបណ្តេញចេញ និងបញ្ចូនទៅកាន់ទឹកដីផ្សេងទៀត។ កាលពីប៉ុន្មានខែមុន រដ្ឋាភិបាលអូស្ត្រាលី ធ្លាប់បញ្ជូនក្រុមជនភៀសខ្លួនដែលស្វែងរកសិទ្ធិជ្រកកោននៅអូស្ត្រាលី ទៅឥណ្ឌូនេស៊ីវិញក៏មាន។

-ចំនួនជនភៀសខ្លួនធ្វើដំណើរមកអូស្ត្រាលីកាន់តែច្រើនឡើង៖
រយៈពេលប៉ុន្មានឆ្នាំចុងក្រោយនេះ ចំនួនជនភៀសខ្លួនដែលធ្វើដំណើរមកសុំសិទ្ធិរស់នៅនៅក្នុងទឹកដី អូស្ត្រាលីមានការកើនឡើងខ្លាំង។ តាមពិតទៅមានតែប្រទេសមួយចំនួនតូចប៉ុណ្ណោះដែលចូលរួមក្នុងកម្មវិធី តាំងទីលំនៅថ្មីរបស់ជនភៀសខ្លួន បង្កើតឡើងដោយឧត្តមស្នងការទទួលបន្ទុកជនភៀសខ្លួន ក្នុងនោះមានអាមេរិក កាណាដា អូស្ត្រាលី ប្រទេសនៅអឺរ៉ុបខាងកើត និងអាមេរិកឡាទីន។ យោងតាមរបាយការណ៍ឧត្តមស្នងការខាងលើ ក្នុងឆ្នាំ ២០១៣ អូស្ត្រាលីបានអនុញ្ញាតទទួលយកជនភៀសខ្លួនប្រមាណ ២៤០០០០នាក់ដែលស្មើនឹងចំនួន ៤ភាគរយ នៃចំនួនជនភៀសខ្លួនទូទាំងពិភពលោក ដែលនេះជាចំនួនដ៏ធំមួយ។ ប៉ុន្តែយ៉ាងណាក៏ដោយចំនួនជនភៀសខ្លួនទាមទារសិទ្ធិជ្រកកោនមានការកើនឡើង ជាលំដាប់ ដូច្នេះហើយទើបរដ្ឋាភិបាលអូស្ត្រាលីចាំបាច់ត្រូវរឹតបន្តឹងការទទួលយក ជនភៀសខ្លួន។

-ជំរុំសម្រាប់ជនភៀសខ្លួនមានភាពខ្វះខាតនិងប៉ះពាល់ដល់សុខភាព
តាមពិតទៅនៅអូស្ត្រាលី មិនបានទទួលយកជនភៀសខ្លួនអោយទៅរស់នៅក្នុងទឹកដីគេផ្ទាល់ឡើយ តែរដ្ឋាភិបាលកង់បេរ៉ា បានចុះកិច្ចព្រមព្រៀងជាមួយប្រទេសជិតខាងដូចជាប៉ាពូញូហ្គីណេ និងណាអូរ៉ូ អោយទទួលយកការតាំងលំនៅរបស់ក្រុមជនភៀសខ្លួនទាំងនោះ។ ប៉ុន្តែយ៉ាងណាក៏ដោយ កាលពីថ្មីៗនេះ មានរបាយកាណ៍មួយបញ្ជាក់ថាជំរុំដែលជនភៀសខ្លួនទាំងនោះកំពុងរស់នៅមាន កង្វះអនាម័យ ខ្វះសេវាថែទាំ និងគ្មានជំនួយឧបត្ថម្ភត្រឹមត្រូវ ហើយក្មេងប្រុសជនជាតិអ៊ីរ៉ង់ពីរនាក់បានស្លាប់បាត់បង៉ជីវិតដោយសារ បញ្ហានេះផងដែរ។ ដោយសារតែបញ្ហាប្រឈមទាំងនេះ ទើបគេចាំបាច់ត្រូវផ្លាស់ប្តូរការតាំងទ៏លំនៅរបស់ជនភៀសខ្លួន ទាំងនោះ។

៤. តើការតាំងទីលំនៅនៅកម្ពុជារបស់ក្រុមជនភៀសខ្លួនទាំងនោះជាលក្ខណៈ អចិន្ត្រយ៍ឬ? ហើយរដ្ឋាភិបាលមានភារកិច្ចធ្វើអ្វីខ្លះចំពោះជនភៀសខ្លួនទាំងនោះ?

វាទាក់ទងនឹងការសម្រេចចិត្តរបស់ជនភៀសខ្លួនទាំងនោះ ពួកគេអាចចាកចេញពីកម្ពុជាត្រលប់ទៅប្រទេសកំណើតពួកគេវិញ និងអាចបន្តសុំសិទ្ធិជ្រកកោននៅទឹកដីប្រទេសណាដែលពួកគេចង់ទៅរស នៅបានទៀត។ ពាក្យថាការតាំងទីលំនៅថ្មី(Resettlement) ដែលមានចែងក្នុងអនុញ្ញាសញ្ញាអន្តរជាតិ និងនៅក្នុងគម្រោងផ្តល់ការតាំងទីលំនៅរបស់ទីភ្នាក់ងារទទួលបន្ទុក ជនភៀសខ្លួន មានន័យថាប្រទេសដែលទទួលយកជនភៀសខ្លួនមានជាប់កាតព្វកិច្ចត្រូវតែផ្តល់ ការការពារផ្លូវច្បាប់ និងរូបរាងកាយដល់ជនភៀសខ្លួន ការផ្គត់ផ្គង់សេវាសុខាភិបាល ជាពិសេសផ្តល់អោយពួកគេនូវសិទ្ធិនយោបាយ សេដ្ឋកិច្ច សង្គម វប្បធម៌ ជាដើមដួចប្រជាជននៃរដ្ឋនោះដែរ។ មិនត្រឹមតែប៉ុណ្ណោះរដ្ឋាភិបាល និងអង្គការសង្គមស៊ីវិលត្រូវផ្តល់អោយជនភៀសខ្លួនទាំងនោះនូវ សេវាសាធារណៈ ការសម្រួលដល់ការធ្វើសមាហរណកម្មជាមួយប្រជាជនដទៃទៀត ផ្តល់ការបណ្តុះបណ្តាលបំពាក់បំប៉នដល់បណ្តាជនភៀសខ្លួនទាំងនោះដើម្បីអោយ ពួកគេក្លាយជាកម្លាំងចលករមួយជំរុញសេដ្ឋកិច្ចជាតិអោយលូតលាស់។

៥.ហេតុអ្វីស្ថាប័នអន្តរជាតិ និងប្រជាជនមួយចំនួនមិនគាំទ្រអោយជនភៀសខ្លួនទាំងនោះមកតាំងទីលំនៅនៅកម្ពុជា?

តាមពិតទៅជនភៀសខ្លួនទាំងនោះ គួរតែអាចទទួលបានសិទ្ធិជ្រកកោននៅក្នុងទឹកដីនៃប្រទេសដែលខ្លួនទៅដល់ ដំបូងបំផុត ហើយមិនគួរត្រូវបានប្រទេសអូស្ត្រាលីបញ្ជូនទៅកាន់ប្រទេសទីបី ឬទីបួនបន្តបន្ទាប់ទៀតដែរ។ គេព្រួយបារម្ភចំពោះការតាំងទីលំនៅរបស់ជនភៀសខ្លួននៅកម្ពុជា គឺដោយសារកម្ពុជាជាប្រទេសកំពុងអភិវឌ្ឍន៍ មានសេវាសុខាភិបាលទន់ខ្សោយ ការគោរពសិទ្ធិមនុស្សនៅមានកម្រិតជាដើម។ ដូច្នេះហើយគេភ័យខ្លាចថាកម្ពុជាមិនមានលទ្ធភាពគ្រប់គ្រាន់ក្នុងការ មើលថែទាំ និងថែរក្សាជនភៀសខ្លួនទាំងនោះបានល្អប្រសើរឡើយ។ ចំណែកអូស្ត្រាលីបរាជ័យក្នុងការគោរពកាតព្វកិច្ចមនុស្សធម៌អនុលោមតាម អនុសញ្ញាស្តីពីសិទ្ធិជនភៀសខ្លួន ដោយប្រើប្រាស់នូវការរឹតបន្តឹងការផ្តល់សិទ្ធិជ្រកកោន ចាប់ជនភៀសខ្លួនឃុំឃាំង និងបញ្ជូនពួកគេទៅកាន់ទីកន្លែងដែលគ្មានការផ្គត់ផ្គង់និងថែទាំ ត្រឹមត្រូវជាដើម៕

No comments:

Post a Comment

Subscribe to: Posts (Atom)