គ្រូនិងសិស្សនៅវិទ្យាល័យសិរីសោភ័ណប្រតិកម្មការតម្រូវឲ្យសិស្សកាត់ឯកសារបែបថ្មី
ក្រុមគ្រូបង្រៀន និងសិស្សសាលាមួយចំនួនប្រតិកម្មប្រឆាំងការសម្រេចរបស់នាយិកានៃ វិទ្យាល័យសិរីសោភ័ណ ក្នុងខេត្តបន្ទាយមានជ័យ។ ការបង្ហាញការមិនពេញចិត្តនេះ នៅបន្ទាប់ពីនាយិកានៃវិទ្យាល័យសិរីសោភ័ណ តម្រូវឲ្យសិស្សដែលសិក្សានៅវិទ្យាល័យនេះទាំងអស់ត្រូវកាត់ ឯកសណ្ឋានតាមបែបថ្មី ក្រៅពីសំលៀកបំពាក់ដែលពួកគេកំពុងប្រើប្រាស់សព្វថ្ងៃបន្ថែមទៀត។គ្រូបង្រៀននិយាយថា ការជំរុញឲ្យប្រើសម្លៀកបំពាក់ថ្មីនេះ ចាប់អនុវត្តបានជាង ១ខែមកហើយ ខណៈពេលដែលសិស្សសាលាភាគច្រើនដែលកំពុងសិក្សានៅទីនោះបញ្ជាក់ជំហរ មិនពេញចិត្តជុំវិញចំណាត់ការរបស់នាយិកានៅពេលនេះ ដោយពួកគេចាត់ទុកថា ជាសកម្មភាពផ្ទុយពីគោលការណ៍របស់ក្រសួងអប់រំយុវជននិងកីឡា។
គ្រូបង្រៀនម្នាក់ដែលបង្រៀននៅទីនោះ និយាយក្នុងលក្ខខណ្ឌមិនបញ្ចេញឈ្មោះ ឲ្យដឹងនៅថ្ងៃទី២២ ខែកញ្ញា ថា តម្រូវការថ្មីរបស់នាយិកានេះ គឺវាលើសពីសមត្ថភាពរបស់សិស្ស ជាពិសេសអ្នកដែលមានជីវភាពក្រីក្រ។ លោកបន្តថា ពួកគេត្រូវចំណាយមិនតិចជាង ១០ម៉ឺនរៀលទេក្នុងមួយឈុតឯកសណ្ឋានតាមបែបសិស្សសាលា ក្នុងនោះរួមទាំងទ្រនាប់ជើងផង។
ម្យ៉ាងវិញទៀតលោកអះអាងថា អ្វីដែលនាយិកានៃវិទ្យាល័យសិរីសោភ័ណនេះ អាចធ្វើអ្វីទៅបាន គឺមានខ្នងបង្អែកយ៉ាងក្រាស់នៅពីក្រោយ គឺបងប្រុសរបស់អ្នកស្រីជារដ្ឋលេខាធិការនៃក្រសួងអប់រំថែមទៀតផង។
លោកចាត់ទុកថា នេះមិនខុសពីការចាប់បង្ខំសិស្សឲ្យអនុវត្តតាមគោលការណ៍ដែលមិនមាននៅក្នុងក្រសួងអប់រំនោះទេ៖ «អ្នក គ្រូដែលជានាយិកាហ្នឹងគាត់ត្រូវជាប្អូនលោក ណាត ប៊ុនរឿន ដែលជារដ្ឋលេខាធិការក្រសួងអប់រំផងហ្នឹង គាត់តែងតែអាងអំណាចអាងបងៗអ៊ីចឹងគឺថា គាបសង្កត់ទៅលើគ្រូៗ ជួនកាលទៅដល់សិស្ស និងអាណាព្យាបាលសិស្សក៏មានដែរ។ រហូតទៅដល់ស្ថាប័នថ្នាក់លើដែលជាមន្ទីរអប់រំអ៊ីចឹងជាដើម។ អ៊ីចឹងទៅមិនសូវមានពីណាគេហ៊ានងើប។ គេខ្លាចទាក់ទងទៅនឹងកាតគាបសង្កត់របស់គាត់ហ្នឹង»។
ដោយឡែកក្រុមសិស្សសាលាមួយចំនួនដែលសិក្សានៅវិទ្យាល័យសិរីសោភ័ណ វិញ ត្អូញត្អែរថា ពួកគេពិតជាពុំមានលទ្ធភាពក្នុងការរកលុយដើម្បីបំពេញតម្រូវការ បន្ថែមនេះទៀតឡើយ។ មួយវិញទៀត ពួកគេអះអាងថា នេះជាបន្ទុកមួយជាន់ទៀតក្រៅពីការចំណាយលុយដ៏ច្រើនក្រាស់ក្រែល ក្នុងការរៀនគួរបន្ថែមស្ទើរគ្រប់មុខវិជ្ជាហើយនោះ។
ក្រុមសិស្សសាលានិយាយថា ពួកគេមិនទាន់ចាំបាច់ណាស់ណារឿងឯកសណ្ឋានថ្មីទៀតឡើយ ដោយហេតុថា សម្រាប់ឯកសណ្ឋានដែលមានស្រាប់ គឺសមរម្យណាស់ទៅហើយ៖ «សម្រាប់ខ្ញុំ ខ្ញុំអត់សូវពេញចិត្តប៉ុន្មានទេ ព្រោះអីខ្ញុំជាសិស្សក្រីក្រម្នាក់។ កូនខ្លះសិស្សដែលគ្នាមកពីកន្លែងដែលគ្នាក្រីក្រហ្នឹង គឺឪពុកម្ដាយកូនសិស្សហ្នឹងដូចជាមិនចូលចិត្តប៉ុន្មានដែរ»។
ឆ្លើយតបប្រតិកម្មនេះ នាយិកាប្រតិបត្តិនៃវិទ្យាល័យសិរីសោភ័ណ អ្នកស្រី ណាត ស៊ីឡាយ អះអាងថា អ្នកស្រីមិនបានចាប់បង្ខំសិស្សជាចាំបាច់ត្រូវតែកាត់សំលៀកបំពាក់ ដូចអ្វីដែលអ្នកស្រីចង់បាននោះទេ។ អ្នកស្រីបន្តថា ផ្ទុយទៅវិញ បើសិស្សសាលាមួយណាពុំមានលទ្ធភាពទេ ហើយពិតជាមានឆន្ទៈចង់បានមែននោះ អ្នកស្រីអាចឲ្យពួកគេសងរំលោះបាន។
អ្នកស្រីពន្យល់ថា មុននឹងអ្នកស្រីសម្រេចថា នឹងដាក់ឲ្យមាននូវឯកសណ្ឋានថ្មីនេះ គឺបានពិគ្រោះយោបល់រួចហើយជាមួយអភិបាលខេត្តបន្ទាយមានជ័យ មុននឹងដំណើរនៅពេលនេះ៖ «ខ្ញុំធ្វើគឺសាលាចេញទៅមានរបៀបរបប តែម្ដង ហើយឯកឧត្ដមគាត់អ្នកឲ្យយោបល់ខ្ញុំ។គាត់ថាប្រសិនបើសាលានៅក្នុង ខេត្តបន្ទាយមានជ័យ មានឯកសណ្ឋានរៀបរយល្អ វាជាកិត្តិយសសម្រាប់ប្រជាជនកម្ពុជា ក៏ដូចជាសិស្សសាលាទូទាំងប្រទេសទាំងអស់។ គាត់ថា មើលថៃគេរៀបចំស្អាតណាស់អ្នកគ្រូ ហើយខ្ញុំមិនបានឲ្យកាត់បួនប្រាំកំប្លេ បំផ្លាញលុយឪពុកម្ដាយទេ សូមតែមួយកំប្លេ»។
បើតាមអ្នកស្រី ណាត ស៊ីឡាយ ឯកសណ្ឋានថ្មីនេះ គឺមានលក្ខណៈដៃប៉ោងស្មា ហោប៉ៅមុខពីរ ហើយខ្វៀលចង្កេះបន្តិច។ អ្នកស្រីឲ្យដឹងទៀត គិតមកដល់ពេលនេះ ឯកសណ្ឋានដែលកាត់រួចមានចំនួន ១៥០កំប្លេនៅឡើយទេ។ អ្នកស្រីនិយាយថា ជាការពិតឯកសណ្ឋានដែលអ្នកស្រីតម្រូវឲ្យមាននេះ គឺទុកសម្រាប់ប្រើក្នុងពេលមានពិធីសំខាន់ៗ ដូចជាគោរពទង់ជាតិ ឬព្រឹត្តិការណ៍នៅក្នុងវិស័យអប់រំប៉ុណ្ណោះ។
ចំណែកប្រធានមន្ទីរអប់រំខេត្តបន្ទាយមានជ័យ លោក ឈើយ ចាន់ណា បានឆ្លើយតបយ៉ាងខ្លីថា មានការចាំបាច់មិនអាចនិយាយបានមុនផ្ដាច់ទូរស័ព្ទចុះ។
យ៉ាងណាក៏ដោយលោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ យល់ឃើញថា នេះជាលក្ខខណ្ឌមួយដែលផ្ទុយពីគោលការណ៍របស់ក្រសួងអប់រំយុវជននិង កីឡា។ ជាងនេះទៀតនោះ តម្រូវការតាមបែបថ្មីនេះ លោកចាត់ទុកថា វាពិតជាប៉ះពាល់ជាខ្លាំងចំពោះជីវភាពរបស់សិស្ស៖ «អ្នកក្រីក្រច្រើនទៅហើយយើងតម្រូវឲ្យខាងតែបាន អាហ្នឹងវាមានការប៉ះពាល់ទៅដល់លទ្ធភាព ឪពុកម្ដាយអ៊ីចឹងផងដែរ»។
No comments:
Post a Comment