វិប្បដិសារីមួយក្នុងរលកជីវិត សុខ ពិសី
ប្រភព: Postkhmer
ដោយសារការស្រឡាញ់សិល្បៈចម្រៀងតាំងពីតូចក្រូចឆ្មារបានញ៉ាំង ឲ្យតារាចម្រៀង សុខ ពិសី ដែលដើមឡើយមានទីលំនៅ នៅឯ ក្រុងតាខ្មៅ ជម្នះគ្រប់ឧបសគ្គធ្វើដំណើរចុះឡើងមក ភ្នំពេញ ដើម្បីស្វែងរកឱកាសហក់ចូលវិស័យចម្រៀង។ ក្រោយពេលបានសម្រេចបំណង និងទទួលបានភាពល្បាញល្បីកាន់តែខ្លាំងនោះ ស្រាប់នៅក្នុង ឆ្នាំ២០០៨ តារារូបនេះទទួលរងវិប្បដិសារីស្ទើរងើបមុខមិនរួច ដោយសារតែម្តាយរបស់នាងរួមជាមួយនឹងបងប្អូនជាច្រើននាក់បានស្លាប់ ក្នុងពេលតែមួយនៅក្នុងគ្រោះថ្នាក់ចរាចរណ៍មួយនៅលើផ្លូវជាតិលេខ ៤ ដែលរូបនាងជាអ្នកបើកបរ។ តើការប្រឹងប្រែងរស់ក្រោយម្តាយស្លាប់របស់តារាចម្រៀងរូបនេះទៅជា យ៉ាងណា?
នាង សុខ ពិសី មានកំណើតកើតជានៅថ្ងៃ ទី១៩ ខែធ្នូ ឆ្នាំ១៩៩០ នៅ ក្រុងតាខ្មៅ ខេត្តកណ្ដាល។ តារាស្រីសាច់សខ្ចីរូបនេះមានឪពុកឈ្មោះ សុខ ហេង អាយុ ៤៨ឆ្នាំ ជាមន្ត្រីក្នុងជួរទាហាន រីឯម្ដាយឈ្មោះ រស់ សុគន្ធារី (បានទទួលមរណភាពក្នុងហេតុការណ៍ក្រឡាប់រថយន្តកាលពី ខែមេសា ឆ្នាំ២០០៨)។ សុខ ពិសី មានបងប្អូនបីនាក់ (ប្រុស ២ ស្រី ១) ហើយនាងជាកូនទីពីរ។ នាងមានកម្ពស់ ១៦៧ សង់ទីម៉ែត្រ និងមានទម្ងន់ជាមធ្យម ៤៧ គីឡូក្រាម។
សុខ ពិសី បានបញ្ចប់ការសិក្សាថ្នាក់បាក់ឌុបក្នុង ឆ្នាំ២០០៨ ប៉ុន្មានខែក្រោយពេលដែលនាងជួបគ្រោះថ្នាក់ក្រឡាប់រថយន្ត ហើយនាងត្រូវចូលរួមប្រឡងទាំងឈឺតែម្តង។ គ្រោះល្អនាងបានជាប់ការប្រឡងមធ្យមសិក្សាទុតិយភូមិ ហើយក៏បានឱកាសចូលបន្តការសិក្សានៅសាកលវិទ្យាល័យឯកជនមួយ។
ដោយសារតែចង់ក្លាយជាតារាចម្រៀង និងមានឈាមជ័រជាអ្នកសិល្បៈផងនោះ (ជីតាជាអ្នកនិពន្ធ និងម្តាយជាគ្រូសិល្បៈនៅសាលា) នៅអាយុ ១៧ឆ្នាំ យុវតីនាង សុខ ពិសី ក៏បានចូលខ្លួនមកហាត់រៀនផ្នែកសិល្បៈចម្រៀងនៅក្នុងក្លិបមួយ កន្លែង។ ដោយមើលឃើញថា នាងមានទេពកោសល្យ គ្រូបង្ហាត់ក៏បានណែនាំឲ្យនាងបានសុំធ្វើតេស្តច្រៀងនៅផលិតកម្ម KH ជាលទ្ធផល នាងក៏បានជាប់ការធ្វើតេស្តសំឡេងនោះ ហើយនាងក៏បានក្លាយជាតារាចម្រៀងពេញសិទ្ធិរបស់ KH តែម្តងនៅក្នុង ឆ្នាំ២០០៥។
តារាចម្រៀងនាង សុខ ពិសី។ សេត គឹមសឿន
លុះនៅ ឆ្នាំ២០០៧ តារាចម្រៀងដែលមានឈ្មោះល្បីរួចជាស្រេចនៅ KH ក៏បានប្តូរទ្រនំទៅកាន់ផលិតកម្ម Nice Star ទាំងមានបណ្តឹងប្រទាំងប្រទឹសពីលោក គឹម ហេង ចាងហ្វាងផលិតកម្ម KH។ នៅ ឆ្នាំ២០០៨ ជាឆ្នាំដ៏អាក្រក់នៅក្នុងជីវិតតារាចម្រៀង សុខ ពិសី ដោយសារតែរថយន្ត Lexus ផ្ទុកមនុស្សណែនរបស់នាង ដែលបើកបរដោយនាងផ្ទាល់ បានក្រឡាប់ជាច្រើនត្រឡប់នៅតាមបណ្តោយផ្លូវជាតិ លេខ ៤ ឆ្ពោះទៅ ខេត្តព្រះសីហនុ ជាទីដែលនាងត្រូវឡើងច្រៀង។ ក្នុងនោះមនុស្ស ៤នាក់ បានស្លាប់ ដោយរួមទាំងម្តាយរបស់នាងផង។ សុខ ពិសី ក៏បានក្លាយជានារីកំព្រាម្តាយ តាំងពីនាងមានអាយុ ២០ឆ្នាំ។ រឿងហេតុមួយនេះដែលត្រូវបានគេដឹងថា ជាវិប្បដិសារីដ៏ធំបំផុតនៅក្នុងជីវិតរបស់តារាចម្រៀងស្រីល្បី ឈ្មោះមួយនេះ។
ទាំងអារម្មណ៍ក្តុកក្តួលរំជួលចិត្ត ដ្បិតពេលនេះចំរដូវភ្ជុំបិណ្ឌផងនោះ សុខ ពិសី បានរៀបរាប់ទាំងទឹកភ្នែករលីងរលោងថា ក្រោយអ្នកម្តាយរបស់នាងលាចាកលោកទៅ នាងពិតជាប៉ះពាល់ដល់ផ្លូវអារម្មណ៍ខ្លាំងណាស់ ហើយនាងបានជួបការលំបាកច្រើនជាងមុន។
ពិសី និយាយទាំងអួលដើមករថា៖ «ពីមុនខ្ញុំហត់នឿយ ខ្ញុំតែងនិយាយតម្អូញតម្អែរប្រាប់ម្តាយខ្ញុំ ហើយគាត់តែងលួងលោម និងជួយខ្ញុំរហូត ហើយពេលទៅណាមកណា គាត់តែងនៅជាមួយខ្ញុំជានិច្ច។ ដៃទាំងពីររបស់គាត់ថ្នាក់ថ្នមខ្ញុំរហូតតាំងពីតូចមក ទោះបីជាហត់នឿយប៉ុនណាក៏បានរសាយដែរ ប៉ុន្តែនៅពេលនេះ អត់មានទៀតទេ»។
ប៉ុន្តែយ៉ាងណាតារាស្រីរូបនេះ ក៏មិនរស់នៅឯកានោះដែរ ដោយសារតែរូបនាងមានលោកឪពុកជួយមើលថែគ្រប់យ៉ាងបន្តជាមួយនឹងបង ប្អូនសាច់ញាតិ។
ទោះបីជារំលងអស់រយៈពេលជាច្រើនឆ្នាំ ប៉ុន្តែស្រមោលអតីតកាលនៅតែធ្វើឲ្យតារាស្រីរូបនេះស្រក់ទឹកភ្នែក ដោយសារតែនឹកអ្នកម្តាយជាទីស្រឡាញ់។ នៅក្នុងរដូវភ្ជុំបិណ្ឌនេះ (គិតត្រឹមថ្ងៃ ទី១៦ កញ្ញា បិណ្ឌ ទី៨) សុខ ពិសី បានឲ្យដឹងថា រូបនាងបាននាំយកនូវចង្ហាន់ និងបច្ច័យទៅប្រគេនដល់ព្រះសង្ឃបាន ៤ វត្តហើយ ដើម្បីឧទ្ទិសមគ្គផលទាំងឡាយជូនអ្នកម្តាយ និងញាតិទាំង ៧ សន្តាន។
ទាំងអារម្មណ៍រន្ធត់ចិត្តដ្បិតបាត់ម្តាយជាទីស្រឡាញ់នោះ សុខ ពិសី បានឲ្យដឹងថា៖ «នៅពេលទៅណាមកណាឃើញគេមានម្តាយ ខ្ញុំពិតជាតូចចិត្តណាស់ ខ្ញុំចង់ប្រាប់ថា កូននឹកម៉ាក់ ចង់ឱបម៉ាក់ណាស់… ហើយខ្ញុំនឹងទៅឲ្យបានច្រើនវត្តដើម្បីឧទ្ទិសមគ្គផលជូនគាត់»។
គួរបញ្ជាក់ថា ក្រោយរងគ្រោះថ្នាក់ក្រឡាប់រថយន្តគេគ្រប់គ្នាបានគិតថា សុខ ពិសី នឹងបញ្ចប់អាជីពសិល្បៈរបស់នាង តែអ្វីៗ បែរជាខុសការស្មាន ខណៈដែលស្ងាត់ៗ សុខ ពិសី ក៏វិលមកកាន់វិថីចម្រៀងវិញ ក្នុង ខែមេសា ឆ្នាំ២០០៩ ជាតារាចម្រៀងក្នុងផលិតកម្មកូរ៉េមួយ ប៉ុន្តែបានតែមួយដង្ហើមចង្រិតផលិតកម្មនោះក៏បិទទ្វារ។ ដោយសារតែនាងនៅតែមានទឹកដមសំនៀងល្អ ពិសី ក៏បានក្លាយជាតារាចម្រៀងរបស់ផលិតកម្ម សាន់ដេ រហូតមកដល់សព្វថ្ងៃនេះ ហើយនាងកំពុងក្រសោបបានភាពល្បីល្បាញយ៉ាងខ្លាំងផងដែរ៕
No comments:
Post a Comment